शिरसगाव काटा येथील घटना
शिक्रापूर: शिरसगाव काटा (ता. शिरुर) येथे अशोक जाधव व पोपट जाधव यांची शेजारी शेजारी शेती असून पोपट जाधव याने शेजारील शेतातील पाण्याची सारण फोडली. त्यामुळे अशोक याने तू शेतातील सारण का फोडतोस असे विचारले. त्यामुळे पोपटयाने चिडून जाऊन अशोक व त्याच्या आईला शिवीगाळ, दमदाटी करत अशोकच्या आईला ढकलून देत अशोकला खोऱ्याच्या दांड्याने मारहाण करत जखमी करुन अशोकचा मोबाईल फोडून नुकसान केले.
याबाबत अशोक जगन्नाथ जाधव (वय ३८) रा. शिरसगाव काटा (ता. शिरुर) जि. पुणे यांनी शिरुर पोलीस स्टेशन येथे फिर्याद दिली असल्याने शिरुर पोलिसांनी पोपट संपत जाधव रा. शिरसगाव काटा (ता. शिरुर) जि. पुणे याच्या विरुद्ध गुन्हे दाखल केले असून सदर गुन्ह्याचा पुढील तपास पोलीस निरीक्षक सुरेशकुमार राऊत यांच्या मार्गदर्शनाखाली सहाय्यक पोलीस उपनिरीक्षक राजेंद्र साबळे हे करत आहे.
